Categorized | Uncategorized

Woelige Wit Welpies

Die Deneys Croc Ranch het op 19 Januarie ‘n groot verrassing gekry toe hul wit leeuwyfie geboorte geskenk het aan vier wit leeuwelpies. Wit leeus gee selde geboorte aan meer as twee welpies. Hier spog die trotse eienaar, mev. Ina van Rooyen, met die nuwe “kroos”.

SASOLBURG. – Die Deneys Croc Ranch het op 19 Januarie ‘n baie rare verrassing gekry toe hulle wit leeuwyfie geboorte geskenk het aan vier wit leeuwelpies.
“Dit is baie, baie seldsaam dat wit leeus geboorte gee aan meer as twee welpies,” het ‘n baie trotse eienaar, me. Ina van Rooyen, vertel.
Sy en haar man Charles besit die Croc Ranch nou al vir die afgelope 12 jaar. Afgesien van die pragtige wit leeuwelpies is daar ook volgroeide wit leeus, bruin leeus, baie krokodille, Emu’s en ook heelwat voëls en plaasdiere om te besigtig.
“Ons bruin leeuwyfie is ook hoogs dragtig, so een van die dae het ons weer ‘n werpsel,” vertel ‘n opgewonde Charles. Hulle is elke dag van die week van 9:00 tot 16:00 oop, behalwe op Maandae.

As jy dalk die pragtige, rare wit leeuwelpies wil gaan besigtig, dit is verseker die moeite werd. Hulle het ook ‘n ten volle gelisensieerde restaurant waar ‘n mens lekker kan kuier. Die Deneys Croc Ranch is net buite Deneysville op die Vereeniging-pad. Vir meer inligting kan Ina by 082 801 7070 gekontak word.
Bron: vaalweekblad.com