Categorized | Uncategorized

Transvalia se trots spog met 10 onderskeidings

Boonop is sy een van slegs vyf leerlinge in Gauteng wat hierdie prestasie kon behaal. Annelie se vakke was Afrikaans huistaal, Engels Eerste Addisionele taal, wiskunde, lewensoriëntering, rekeningkunde, lewenswetenskappe, fisiese wetenskappe, ingenieursgrafika en ontwerp, Alpha wiskunde, 3de vraestel wiskunde en musiek. Annelie vertel dat sy gewerk het vir onderskeidings in al haar vakke, maar dat sy na die eksamen nie meer so seker was nie! Sy het dit egter reggekry. Hoewel Alpha Wiskunde nie op die matrieksertifikaat verskyn nie het sy ook 82% daarvoor behaal. Annelie het ‘n kop vir syfers, en haar gunstelingvakke was Wiskunde, Alpha wiskunde en rekeningkunde. Sy is van plan om hierdie jaar Aktuariële Wetenskap aan die Noordwes Universiteit te studeer.

Annelie glo daar is nie ‘n kortpad vir sukses nie. “My leuse is: Doen ’n bietjie meer as waarvoor jy betaal word. Gee ’n bietjie meer as wat van jou verwag word. Probeer ’n bietjie harder as normaalweg. Mik ’n bietjie hoër as wat jy dink jy kan, geniet wat jy doen en sukses sal outomaties volg,” vertel sy.

Haar prestasies eindig ook nie by akademie nie. “Kultuur was nog altyd my forté. Ek neem elke jaar deel aan sangkunstefeeste, skoolkonserte, debat en redenaars. Ek het al deurgedring tot die ATKV redenaars se landsfinale. Ek speel ook al vyf jaar skaak vir die skool se eerstespan,” sê Annelie. Sy is die oudste dogter van Jannie en Linda du Plessis. Jannie besit verskeie besighede in die Vaaldriehoek en omliggende omgewing, en Linda is die vise-rektor van die Noordwes-Universiteit (Vaaldriehoekkampus).

“Matriek was ‘n besige, maar onvergeetlike jaar,” sê Annelie. “Tussen skool, vriende en familie het ons baie kosbare oomblikke gedeel!”
Bron: vaalweekblad.com