Categorized | Uncategorized

Terapie honde versprei glimlagte

PARYS. – Breë glimlagte het onlangs oor die gesigte van Parys Epilepsie-sentrum se inwoners versprei toe hulle onlangs deur drie terapie-honde en hul eienaars besoek is.

Fransi Coetzer van Sasolburg, Louise van Niekerk en Adele van den Berg, albei van Vanderbijlpark, het nie net ‘n groot liefde vir honde nie, maar ook vir minderbevoorregte en gestremde mense.
Hulle het die Epilepsie-sentrum se inwoners op 8 Desember besoek omdat hulle voorheen reeds die po-sitiewe uitwerking ervaar het wat terapie-honde op sulke pasiënte het.

Inwoners van die sentrum het die geleentheid gehad om die honde, Moogly, Dino en Shaka, te vertroetel en die viervoetige vriende het die aandag natuurlik stertswaaiend geniet.
Volgens Adele is sy sommer baie trots op haar hond, Shaka, ‘n Labrador van ses maande oud, wat baie potensiaal as ‘n terapie-hond toon. “Shaka het duidelik ‘n natuurlike aanleg om glimlaggies op mense se gesigte te sit,” sê sy.
Fransi, Louise en Adele beplan om voortaan gereeld besoeke aan die sentrum en ander soortgelyke instansies te bring en het ook pas hul eie klub, Barking Angels Therapy Dogs, ‘n nie-winsgewende organisasie, gestig.
Enige hondeliefhebbers wat meer oor hul bedrywighede wil hoor, kan Adele e-pos by adelewouter@gmail.com of skakel haar by 071 896 5099.

Deelnemende honde hoef nie vorige opleiding te hê nie, maar moet “goeie” persoonlikhede hê. Opleiding sal verskaf word deur Sanmarie Immelman, wat verbonde is aan Groenpunt se honde-eenheid en reeds 27 jaar met honde werk.
Bron:  vaalweekblad.com