Categorized | Uncategorized

Olimpiese held in die Vaal

Gerhard Zandberg, Olimpiese rugslag-swemmer tydens sy eksklusiewe onderhoud met Vaalweekblad

VANDERBIIJLPARK. – ‘n Gebrek aan kop-sterkte en ‘n Jack Russel-geaardheid…
Dit is volgens Gerhard Zandberg, Olimpiese rugslagswemmer van Suid-Afrika, deur die bank die vernaamste tekortkominge in Suid-Afrikaanse swem.
Die 28-jarige Pretorianer wat onder meer in 2004 en 2008 aan die Olimpiese Spele, vier wêreldkampioenskappe en ‘n Statebondspele deelgeneem het, het verlede week by die Virgin Active-gimnasium in Vanderbijlpark swemmers van die Sasol Sharks, Titans en River Rats tydens ‘n tweedaagse opskerpkursus onder hande geneem.
“Ek probeer terugploeg in die sport. Ek is nou aan die einde van my loopbaan. Dit sal selfsugtig wees indien ek 20 jaar se kennis vir myself hou,” het Zandberg in ‘n eksklu-siewe onderhoud met Vaalweekblad gesê.
Volgens Zandberg het hy onlangs vir sy meisie, Lizel Botes, in Vanderbijlpark kom kuier en toe hy vir Benny Jansen, afrigter van die Titans-swemklub, raakgeloop. Hy (Zandberg) het aangebied om die swemmers ‘n paar fynere kunsies te leer en die plaaslike klubs het onmiddellik ingestem.
Zandberg het onlangs ‘n pos in Namibië aanvaar om dié land se elite 15 swemmers af te rig.
“Ek het baie kennis opgedoen deur regoor die wêreld deel te neem. Ek wil dít en my passie vir die sport aan die jonger generasie oordra.”
Hoewel sy visier ingestel is om vanjaar vir die Olimpiese Spele te kwalifiseer, is hy versigtig optimisties en realisties oor sy kanse.
“Ek mik daarna om te kwalifiseer, maar indien ek dit nie regkry nie, gaan ek in April uittree,” het hy gesê.
Buiten al sy kennis en ‘n ooglopende passie vir die sport, beskik hy oor ‘n rare talent om sy boodskap aan die jongspan oor te dra.
“Ek het elke dag voordat ons begin swem het, ‘n 30 minute praatjie met die kinders gehad om te bepaal hoe hulle dink.
Ek wil by hulle tuisbring dat indien ek iemand soos myself as afrigter gehad het toe ek 12 jaar oud was, ek baie vinniger sou verbeter het. Wat hulle in twee dae by my leer, het my drie jaar geneem om uit te vind.”
Volgens hom kan mens nie temperament koop nie, maar wel voor ‘n sekere ouderdom aanleer. “As die wenners-temperament en grondslag nie gelê is teen die tyd wat jy 10 of 11 jaar oud is nie, gaan dit nooit gebeur nie. Baie sielkundiges stem saam,” sê hy.
“Ons jeug word baie beskermd grootgemaak. In sekere gevalle word die kinders opgepiep. Hulle beskik nie oor daardie tipiese Jack Russel-temperament nie. Hulle wil nie veg om te wen nie. ”
“Mens moenie dink omdat jy van Vanderbijlpark af kom wat ‘n klein dorpie is, dat dit jou grens is nie. Ek kom van ‘n plaasdorp af wat nie eers 20 000 mense het nie. Die omvang van jou drome bepaal jou perke.
“As daar nie iemand soos ek is wat vir hulle kom sê daar is iets groter daar buite nie, gaan hulle nooit voelers uitsteek om dit te probeer bereik nie.”Volgens hom moet ouers doelwitte en grense daarstel, maar die afrigters toelaat om hulle werk te doen.
Bron: vaalweekblad.com