Die groot man met die groot stem, Rooies, is geen vreemdeling in die Suid-Afrikaanse musiekbedryf nie. Sowat ‘n dekade gelede is daar vir die eerste keer van hom kennis geneem toe hy partytjieliefhebbers uitbundig laat voetestamp het met sy lekker loslit vermaak.
Hierdie jaar is Rooies terug met ‘n splinternuwe trefferalbum, Hou jou hande van my lyf af, wat wys dat hy, net soos goeie rooiwyn, beslis beter word met tyd.
As jy van Rooies se kenmerkende kwinkslae en gul dansvloerroepstem hou, sal jy nie teleurgesteld wees nie, maar neem kennis – daar is ook ‘n ander, verrassende element teenwoordig wat die projek diepte gee en skimp dat die sagmoedige reus nie net ‘n kundige grapjas is nie. Rooies ervaar beslis nie tans ‘n kreatiewe droogte nie. Op Hou jou hande van my lyf af haak hy jou sommer met die intrapslag, daar is nie een snit op die album wat nie smeek om deurgeluister te word nie.
Die CD is uitgereik deur Vonk-musiek. Vir meer inligting kontak Lydia Winchester by (011) 475-2187.
* Om ‘n kans te staan om hierdie CD te wen, faks slegs die woord “Rooies” saam met jou kontakbesonderhede voor Vrydag na 086 509 5709 of SMS na 41913. SMS’e kos R1-50.
Nuusbron: Mooivaal Media – Vaalweekblad