Mev. Drika Oosthuizen van die dorp het in 2010 die idee gekry om ‘n pan te ontwerp waarin die groot bruin sampioene gebraai kan word.
Sy en haar gesin is baie lief vir sampioene, maar Drika het maar altyd foeliebakkies gemaak waarin sy die sampioene kon sit, sodat die sous deel kon wees van die gereg.
Op ‘n dag het haar skoonsuster haar gevra waarom sy nie haar man vra om vir haar bakkies te maak nie, want dan hoef sy nie altyd die bakkies te vou nie.
Sy het dadelik aan die idee gedink om so iets te laat patenteer, omdat ons Suid-Afrikaners baie lief is vir braai en ook daarvan hou om sampieone te braai.
Met net ‘n prentjie in haar kop, het Drika na iemand begin soek wat haar kon help om die patent te laat registreer.
Toe dit uiteindelik geregistreer is, het die soektog begin om iemand te soek om haar ontwerp ‘n werklikheid te maak. Sy het uiteindelik by Gary van der Elst van Wahl Industries in Johannesburg uitgekom, wat haar gehelp het om haar droom ‘n werklikheid te maak. Hy het haar voorgestel aan hulle ontwerper, Jose, wat toe die tekening ‘n vorm van die pan laat aanneem het.
“Ek weet regtig nie wat ek sonder Gary sou gedoen het nie, want hy was en is nog steeds ‘n baie groot steunpilaar,” sê sy.
Hulle vervaardig ook die panne. Dit word van ‘n baie goeie gehalte “cast alluminium” gemaak en die pennetjies by die skarnier is van vleklose staal. Die pan kan dus glad nie roes nie. Dit maak ook baie maklik skoon.
Die pan is hoofsaaklik ontwerp vir die groot sampioene, maar nadat sy die eerste pan ontvang het, het sy gou besef dat dit meer as net vir die een doel gebruik kan word. Sy het begin eksperimenteer en agtergekom dat dit vir verskeie geregte gebruik kan word – van ‘n groot potbrood tot heerlike geroomde mossels en slakke.
Wat die pan baie veeldoelig maak, is dat jy dit nie net vir ‘n braai kan gebruik nie, maar ook in die oond en bo-op die stoofplaat. Dit is ook die ideale pan om saam te vat om te gaan kamp. Enigeen wat meer oor die pan wil weet, dit wil bemark of wil aanskaf, kan haar by (016) 973-2967 of 084 401 9817 kontak.
Bron: vaalweekblad.com
Drika se veeldoelige pan
SASOLBURG. – Daar is seker niks lekkerder as sampioene wat op die vuur gebraai is nie. Die lekkerste sous gaan egter verlore wanneer dit op die rooster gebraai word.
