Archive | June, 2013

BABA ETHAN-SAAK UITGESTEL

VANDERBIJLPARK. – Die saak waarin die ouers van ‘n 10 maande-oue babaseun wat verlede jaar dood is, na sy dood aangekla is vir kindermishandeling, is uitgestel in die streekhof in Vanderbijlpark sodat die ouers regshulp kan bekom.

Ethan Piet Viljoen (10 maande) is op 2 Augustus 2012 by sy ouers se woning by Palm Court in Vanderbijlpark dood.

Sy ouers, Ashley Anne Jordaan (20) en Trevor Viljoen (20) is na ‘n lang ondersoek in hegtenis geneem nadat die lykskouing getoon het dat Ethan ernstige beserings gehad het wat daarop gedui het dat hy vermoedelik voor sy dood gewelddadig aangerand is. Hy was ook wanvoed en baie ondergewig. Die aanvanklike nadoodse ondersoek het getoon dat die oorsaak van sy dood te wyte was aan ‘n aangebore hartdefek. Die ouers kon tot dusver net vir kindermishandeling aangekla word. Viljoen en Jordaan se eerste baba, ook ’n seuntjie, was net ’n week oud toe hy dood is. Sy dood is destyds beskryf as ’n wiegiedood. Die twee beskuldigdes sal weer op 26 Julie in die streekhof in Vanderbijlpark verskyn.

Bron:  vaalweekblad.com

Posted in UncategorizedComments Off

LEERLINGE GROET ‘OOM WISKUNDE’

VANDERBIJLPARK. – ‘n Geliefde inwoner van die Vaaldriehoek, mnr. Eddie Breytenbach (65), is verlede week na ‘n kort siekbed in die hospitaal oorlede. Hy was veral bekend onder hoërskoolkinders vir die ekstra wiskundeklasse wat hy die afgelope jare aangebied het.

Volgens sy dogter, me. Christa Breytenbach, het haar pa na voltooiing van sy skoolloopbaan by die SA Spoorweë begin werk voordat hy in 1965 ‘n pos by die destydse Yskor aanvaar het.

“Hy het begin as lynoperateur en het hom opgewerk tot voorman by die temperwals in die Noordwerke. Na 35 jaar diens het Pa afgetree en tyd saam met ons spandeer,” sê Christa. Haar ma, Hannetjie, was ‘n verpleegster voordat sy later by Bedworthpark Pick n Pay begin werk het. Sy is reeds in 2007 oorlede.

“Ons het soveel om voor dankbaar te wees. My broer Herman en ek het die wonderlikste ouers gehad, maar vir ‘n te kort tydperk. Pappa was die beste pa ooit en gaan vreeslik gemis word, nie net deur my en Boeta nie maar deur soveel mense en kinders wie se lewens hy aangeraak het,” sê Christa, wat tuisonderrig vir skoolkinders aanbied.

‘n Groep van die leerlinge het Vrydag na afloop van wyle mnr. Breytenbach se begrafnisdiens in die NG Wes-gemeente, hartroerend hulde gebring aan hul “Oom Eddie”, wat duidelik getoon het dat hy nie net hul leermeester was nie, maar ook hul vriend en vertroueling.

Christa bedank graag al die familie, vriende en leerlinge vir hul onderskraging gedurende sy siekte en afsterwe

Bron: vaalweekblad.com

Posted in UncategorizedComments Off

DRIEJARIGE BENODIG LEWEROORPLANTING

Bankbesonderhede: Absa Tjekrekening: 1470158197 Takkode: 334547 Verwysingsnommer: F734 en die skenker se naam en van.

MEYERTON. – Al lyk Shantique van de Reede (3) op die oog af nie siek nie, is hierdie dogtertjie in ’n stryd tussen lewe en dood. Haar lewer funksioneer glad nie en sy moet dringend ’n leweroorplanting ondergaan wat die gesin derduisende rand uit die sak gaan jaag.

Shantique was volgens haar ma Jackie, ’n gesonde dogtertjie wat so nou en dan die gewone siektes soos verkoue gekry het. Sy het op 13 Mei siek geraak by die kleuterskool en groot hoeveelhede bloed opgebring. Haar ma het met haar dokter toe geneem, waar sy gehoor het dat Shantique se keel net geskeur het en dat dit normaal is onder jong kinders.

Die volgende dag was dit egter nog erger en dokters het verskeie toetse, asook ’n sonar gedoen. Hulle het met skok agtergekom dat sy lewer probleme het. Haar lewer het sedert geboorte nooit reg gewerk nie en funksioneer nou glad nie.

Sy is in die Sebokeng Hospitaal opgeneem en twee dae later na die Chris Hani Baragwanath-hospitaal oorgeplaas. Teen die tyd wat sy in die hospitaal opgeneem is, het haar lyfie reeds baie bloed verloor.

Shantique is gebore met ’n genetiese lewer disfunksie. Omdat haar lewer nie in ’n werkende toestand is nie, kan dit nie die bloedtoevoer hanteer nie, wat tot gevolg gehad het dat daar aartjies, soos spatare, in haar magie en longe begin ontwikkel het.

Dit het begin bars en dit is waarom sy soveel bloed begin opbring het. “Sy was ’n doodnormale kind. Een oomblik was sy nog piekfyn en die volgende oomblik sê dokters vir jou jou kind kan dalk doodgaan. Dit is werklik baie erg,” sê Jackie. Shantique het elke dag drie punte bloed ontvang en stadig maar seker beter begin lyk en kon op 25 Mei ontslaan word. Sy kort egter binne die volgende drie maande ’n leweroorplanting en is op ’n waglys geplaas. “Ek het nooit gedink sy sal so siek wees of dat so iets met ons kan gebeur nie,” sê Jackie.

Shantique is ’n regte klein vegtertjie. “Dit gaan goed tannie. Ek het bruin hare en groen ogies,” het Shantique skamerig oor die telefoon aan Vaalweekbad gesê.

Sy is tans onder haar ma se valkoë om te verseker dat sy nie te woelig is nie. Sy is nie op ’n mediese fonds nie en die staat betaal nie vir leweroorplantings nie.

Dit is finansiëel ’n moeilike tyd vir die gesin en daarom is familielede besig om ’n trust te stig om Shantique se lewe te probeer red.

“Ek wil net so graag hê my kleinkind moet gesond word,” sê ouma Marietjie.

Die totale koste van die operasie sal binnekort in Vaalweekblad bekend gemaak word vir diegene wat ‘n bydrae wil maak tot die groot operasie.

Die Van De Reede-gesin bedank elkeen wat hulle in die moeilike tyd bystaan.

Bron:  vaalweekblad.com

Posted in Vaal NewsComments Off